Some Birmingham City fans don dey campaign make dem sack Wayne Rooney before hin carry dem go where dem no know.
Birmingham City fans no gree hear abeg dem just dey vex dey para make dem pursue Wayne Rooney because since wey dem employ am as a coach dem never win any match na only one point Wayne Rooney don collect for dem.
Sunderland bin win Birmingham City 3-1 this afternoon and di match don provoke some Birmingham fans because dem say dia team no get pattern again since Rooney enter.
Dem bin play first half draw wey make some people think say Birmingham fit win di match but wetin dem carry for mind no be wetin dem later see.
Birmingham City new owners wey be Shelby Companies bin sack John Eustace wey dey do well for Birmingham go carry Wayne Rooney around October since then things no come dey go as dem take plan am.
Wayne Rooney for win hin first match last weekend against Ipswich Town but dem bottle 2-0 and di match later end 2-2.
As it stands, Birmingham dey 15th for table,and dem get only 19 points inside 16 matches and dem still dey find dia first win since Wayne Rooney enter as coach.
Rooney don coach 5 matches, lose 4 come draw only one na im make some Birmingham fans dey para make dem sack now wey time still dey.
SEE WETIN SOME OF DIA FANS TOK FOR FACEBOOK AFTER DEM LOSE TODAY
@Lloyd Harrison say:
“Wayne Rooney and co, time don reach wey una go commot for our club”
@John King say:
“those players no won play for Rooney”
Ash Roberts say:
“Naso we just dey lose since Wayne Rooney enter”.
