Everbodi wey know Victor Osimhen very well suppose know say Victor Osimhen na one kind person wey dey loyal and before e go tok anything e go first reason before e tok.
Victor Osimhen become more popular after e help Napoli win their first ever Serie A title in 33 years and ever since then all eyes don dey on am even big clubs from Europe dey hustle dey beg to sign am.
Earlier this week, CBS sports Golazo bin host di 24 year old Napoli and super Eagles striker for their early morning show wey dem dey call ” Morning Footy”.
Dem ask am many questions for di show, dem ask am about hin career, hin fashion style and which team e bin dey admire when e still dey small although Victor Osimhen no gree answer because e say e no fit answer such question because of di respect wey e get for e current club wey be Napoli.
No be only there di question stop, dem ask am small questions about some Nigerian Musicians after e answer finish, one of di presenters wey dey interview am come ask am serious question wey be say if e no calm down answer am some blogs or people fit turn am upside down.
The way Victor Osimhen take answer dem make dem dey shout say Victor Osimhen wise and e still dey humble, see wetin dem ask am:.
” Victor, when you enter Nigeria,and you dey waka for street of Lagos, who you think say people go recognize more, you or Burnaboy?”
Victor Osimhen come first laugh calm down reply dem say:
” I think for me, na different world,di music world dey different from di football world, if I commot people dey rush me same with Burnaboy, both of us don do well for ourselves to dey recognizable, I think for us na good thing say anytime wey you commot you go see your fans coming to you to take pictures, for me I no really care, I dey waka for street just with my security just to relax and interact with my fans, because na dem follow make us dey for where wey we dey today, if no be their support I no think we for dey for where we dey today as well with their criticism and hate so for me e dey very important to interact with my fans”
After e tok finish,those interviewer shock soety dem say Victor Osimhen dey very humble because dem no expect such answer for am.
Victor Osimhen still dey Ivory Coast and na from there e dey do di interview no be say e dey live for di studio , dem call am video call.
Victor Osimhen still dey train well because Nigeria go meet Cameroon for AFCON round of 16 and di match go shele for Houphouet-Boigny stadium wey dey for Abidjan and di date of di match na Saturday, 27 January 2024.
The 24 year old player don score one goal for this tournament and e score di goal against Equatorial Guinea wey help Nigeria play 1-1 draw against Equatorial Guinea.
E still get opportunity to score anoda goal against Ivory Coast but e carry di Penalty give Ekong wey later score di only goal wey help Nigeria beat Ivory Coast for Matchday 2 for group stage.
Nigerians get beta hope for Where Victor Osimhen dey today and dem believe say e go score.
